ഇരിങ്ങാലക്കുട : സാമ്പത്തിക തർക്കത്തെ തുടർന്ന് ബസ് കണ്ടക്ടറെ മർദിച്ച കേസിൽ വധശ്രമത്തിന് പോലീസ് കേസെടുത്തു. അഞ്ചുപേർ അറസ്റ്റിൽ. പുത്തൻചിറ സ്വദേശി പാറേക്കാടൻ തോംസനാണ് (26) മർദനമേറ്റത്. കേസിൽ ആളൂർ വെള്ളാഞ്ചിറ സ്വദേശി കാഞ്ഞിരത്തിങ്കൽ വീട്ടിൽ സെലസ്റ്റീൻ (30), കുഴിക്കാട്ടുശേരി പാറക്കളം സ്വദേശി മൂടവീട് സിജോ (35), തുമ്പൂർ സ്വദേശി കൊളങ്ങരപറമ്പിൽ നവീൻ (29), പുത്തൻചിറ സ്വദേശി ചെറാട്ട് വീട്ടിൽ ശ്രീജേഷ് (39), താഴേക്കാട് സ്വദേശി പാലക്കൽ നിഖിൽ (34) എന്നിവരെയാണ് ഇരിങ്ങാലക്കുട സി.ഐ. അനീഷ് കരീം, എസ്.ഐ. ഷാജൻ എന്നിവർ അറസ്റ്റ് ചെയ്തത്. സംഭവത്തിൽ രണ്ടുപ്രതികളെ കൂടി പിടികൂടാനുണ്ട്.
കഴിഞ്ഞദിവസം രാത്രി പത്തരയോടെ വെള്ളാങ്ങല്ലൂർ പെട്രോൾ പമ്പിൽ വെച്ചായിരുന്നു സംഭവം. തോംസണുമായി പണത്തിന്റെ പേരിൽ നടന്ന തർക്കമാണ് തുടക്കം. പണം നൽകിയ രണ്ടുപേർ തോംസണുമായി സംസാരിക്കാനെത്തുകയും തർക്കത്തെ തുടർന്ന് മറ്റുള്ള അഞ്ചുപേരെ സംഭവസ്ഥലത്തേക്ക് വിളിച്ചുവരുത്തി തോംസണെ ക്രൂരമായി മർദിക്കുകയുമായിരുന്നെന്ന് പോലീസ് പറഞ്ഞു. വിവരമറിഞ്ഞ് സംഭവസ്ഥലത്തെത്തിയ പോലീസ് സംഘം സമീപത്തെ ബാറിൽനിന്നാണ് അഞ്ചുപേരെയും പിടികൂടിയത്. പ്രതികളിൽ ശേഷിക്കുന്ന രണ്ടുപേർക്കായുള്ള അന്വേഷണം ഊർജിതമാക്കിയതായി പോലീസ് പറഞ്ഞു. അറസ്റ്റ് ചെയ്തവരെ റിമാൻഡ് ചെയ്തു.
